Ekipa EITI Dezamiña Informasaun kona-ba Fundu Petrolíferu no Orsamentu Estadu ba Komunidade iha Área Rurál.

Oecusse. Ekipa ida husi Extractive Industry Transparency Initiative (EITI) ne’ebé kompostu husi Reprezentante Ministeriu Petrolium no Rekursu Minerais, Autoridade Nasional Petrolium, Ministériu Finansas no Reprezentante husi Sosiedade Sivil halo dezaminasaun informasaun kona-ba Fundu Petroliferu no Orsamentu Jerál Estadu ba Komunidade sira iha área rurál nune’e sira bele hetan asesu no hatene.
Atividade dezaminasaun informasaun ne’ebé hala’o iha Suku Bobometo, Sub-Distritu Oesilo, Distritu Oecusse iha loron 14 – 15 Setembru 2012 ne’e hanesan atividade pilotu ba dala rua ona, ne’ebé hanesan ho atividade dala uluk nian ne’ebé hala’o iha Suku Naimeko ho grupu tarjetu maka hanesan Autoridade Governu Lokál, Xefe Suku ho nia estrutura sira, Lider Lokal no ONG sira ne’ebé eziste iha Distritu Oecusse.
Helio da Silva hanesan Responsavel ba Ekipa EITI ne’e hateten, programa ida ne’e hala’o ho objetivu atu habelar informasaun ba komunidade sira iha área remotas kona-ba Orsamentu Estadu no papel husi EITI ne’e rasik, nune’e bele asegura transparansia ba Osan ne’ebé tama, osan ne’ebé rai no osan ne’ebé sai.
Helio da Silva afirma, molok programa pilotu ne’e realiza, parte EITI mós hala’o ona programa seluk ho maneira fó kapasitasaun ba Membru ONG, Rede no DLO husi FONGTIL ne’ebé namkari iha distritu 13.
“Intensaun husi atividade ne’e atu Rede Core Group Transparency – Timor Leste, Rede ONG no DLO sira bele sai hanesan matadalan ida ka liman-ain atu bele dezamiña informasaun ba komunidade sira iha área remotas. Hafoin remata atividade kapasitasaun ba Membru sira no tama ba tinan 2012 kontinua ho programa dezamiña informasaun ba Komunidade sira iha área remotas no ba tinan ida ne’e hala’o atividade pilotu iha distritu Oe-cusse, tanba rezultadu peskiza ne’ebé halo husi Ajensia Internasionál sira hatudu katak 62% husi komunidade la hatene kona-ba Orsamentu Jerál Estadu nian no distritu Oecuse sai hanesan distritu ne’ebé nia populasaun boot liu ne’ebé la asesu ba informasaun, tanba ne’e distritu Oecuse deside sai hanesan fatin ba programa pilotu atu hala’o atividade dezaminasaun informasaun ba komunidade sira ”, Helio esplika.
Atividade ida ne’e organiza husi Sekretariadu EITI servisu hamutuk ho Rede Core Group Transparency (CGT) no Forum ONG Timor Leste (FONGTIL) liu-liu Devizaun Advokasia hamutuk ho Rede ONG no DLO iha Distritu Oecusse.
Programa pilotu sei kontinua hala’o iha tinan ida ne’e nia laran iha Distritu Oecusse no nia implementasaun ba distritu seluk sei realiza iha tinan 2013, nune’e komunidade sira bele hatene kona-ba Orsamentu Estadu no Fundu Petroliferu ne’ebé Timor Leste iha.
Helio da Silva mós subliña katak, parte Sosiedade Sivil kontenti tebes ho implementasaun programa ne’e tanba konsidera Sosiedade Sivil sai hanesan Multi Parseria ba Governu hodi hatudu transparansia Orsamentu Estadu no Fundu Mina Rai ba povu tomak. (Ato)

Leave a Reply

Your email address will not be published.

WordPress spam blocked by CleanTalk.