FONGTIL organiza panel ba kandidatu diretór ezekutivu.

Dili. Forum ONG Timor Leste Tersa-feira (31/07/2012) organiza panel ba Kandidatu Diretór Ezekutivu FONGTIL nain tolu ne’ebé pasa ona iha prosesu selesaun dokumentu, Ezame Eskrita no teste intervista ne’ebé hala’o husi ekipa Board FONGTIL.

Kandidatu na’in tolu ne’ebé submete ba panel ne’e mak hanesan Arsenio Pereira da Silva, Mario da Silva Carvalho no Ildefonso C. Guterres.

Diretór Interinu FONGTIL ne’ebé hanesan mós Vise Prezidente Board Mouzinho Nunes iha Salaun Enkontru FONGTIL Caicoli – Dili hateten, prosesu panel ne’e hanesan fase ikus, iha prosesu rekrutamentu ba Diretór Ezekutivu foun hodi troka Diretora Ezekutiva tuan Dinorah Granadeiro ne’ebé rezigna an ona iha fulan Maiu 2012 liu ba.

Mouzinho Nunes mós afirma, panel ba kandidatu sira ne’e hanesan prosesu tranparante ida ne’ebé hala’o iha FONGTIL, hodi hatudu ba públiku katak, rekrutamentu ba diretór foun halo duni ho justu no la iha intesaun nepotizmu.

Durante prosesu panel, reprezentante husi membru ONG Nasional, Internasional no ONG Lokal sira mós partisipa hodi hato’o sira nia pergunta no preokupasaun ba kandidatu sira no husu komitimentu saida mak sira sei halo bainhira sira okupa ona kargu núdar diretór ezekutivu.

Pergunta no preokupasaun ne’ebé barak liu hato’o husi partisipante sira ba kandidatu diretór mak asuntu finansa, jestaun, relasaun externa no interna, inkluindu asuntu seluk ne’ebé iha relasaun ho knar diretór nian. (ATO)

Leave a Reply

Your email address will not be published.

WordPress spam blocked by CleanTalk.