Governu ho Sosiadade Sivil presiza hametin parseria ne’ebé Krítiku no Sustentavel iha dezenvolvimentu rurál.

Dili. Atu hametin parseria entre Organizasaun Sosiedade Sivil ho Governu, Tersa-feira ne’e (23/10/2012) Forum ONG Timor Leste (FONGTIL) organiza sorumutu ida ho Ministériu Administrasaun Estatal nune’e bele hamutuk tau matan ba dezenvolvimentu ne’ebé hala’o iha área rurál, liu-liu ba projeitu fiziku sira.

Diretór Ezekutivu FONGTIL Arsenio Pereira iha abertura sorumutu hateten, programa ne’e sai ona hanesan kultura ba Sekretariadu FONGTIL atu fasilita enkontru entre Sosiedade Sivil ho Orgaun Soveranu sira no Ajensia Internasionál, atu halo aprosimasaun no koperasaun ba dezenvolvimentu.

Sorumutu ne’e mós atu informa ba malu kona-ba memorandu intendimentu ida entre Ministériu Administrasaun Estatal ho ONG Forum Timor Leste, nune’e bele halo monitorizasaun ba projeitu sira ne’ebé hala’o iha área rurál hanesan projeitu Pakote Referendu, PDD no PDL, no iha tinan oin sei iha tan projeitu seluk ho naran PDIP no PNDS.

Sorumutu ne’e atu rona polítika husi parte governu nian relasiona ho projeitu sira ne’ebé hala’o iha área rurál nune’e Sosiedade Sivil sira bele halo monitorizasaun, liu-liu ba kualidade projeitu no sai hanesan baze legál atu bainhira halo monitorizasaun karik sei la kestiona husi Kompañia sira.

Entretantu; Sekretariu Estadu Dezenvolvimentu Lokál Samuela Mendonça ne’ebé reprezenta Ministru Administrasaun Estatal hateten, sorumutu ne’e importante tebes tanba bele iha intendimentu atu hare ba futuru hodi dezenvolve Timor Leste iha parte ekonomia no dezenvolvimentu.

Samuel Mendonça hateten, problema ne’ebé ita infrenta agora mak povu balun hela iha área rurál no balun iha área urbana ne’ebé sai hanesan dinamika ida ba moris ne’ebé la hanesan, maibé ita presiza duni atu dezenvolve povu iha nasaun ida ne’e.

“Tama ba V Governu Konstitusionál, Primeiru Ministru Xanana Gusmão fó ona orientasaun atu hadia buat sira ne’ebé iha IV Governu Konstitusional seidauk lao loos, atu halo dezenvolvimentu iha Timor Leste. Iha parte dezenvolvimentu lokál mós Sekretariadu Estadu Dezenvolvimentu Lokál halo ona preparativu balun ba jestaun administrativu atu bele tama ba Kamara Munisipiu ne’ebé implementa programa desentralizasaun”, Samuel dehan.

Samuel esplika katak, iha tinan 2004 hahú uluk ho PDL (Projeitu Dezenvolvimentu Lokál) ne’ebé hala’o iha Primeiru Governu Konstitusionál ne’ebé fó benefisiu tebes ba Povu Timor Leste, depois kontinua ho Projeitu Pakote Referendu ne’ebé hanesan parte ida atu aseleira kapasidade Komapañia sira ne’ebé ho mekanismu  Ema hotu ne’ebé iha osan bele hetan projeitu ruma, tanba se la iha pakote refendu mak seitór privadu sira labele halo buat ida tanba mekanismu hotu konsentra iha nivel nasional ho liu husi tenderizasaun ne’ebé ema balun de’it mak hetan.

Nia hatutan, hafoin pakote referendu kontinua ho PDD I no PDD II nune’e bele aseleira dezenvolvimentu iha área rurál liu husi prosedimentu oi-oin no kriasaun AND hodi tau matan ba projeitu sira. 

Sekretariu Estadu Dezenvolvimentu Rurál ne’e mós promete sei konsentra atividade iha área rurál, liu-liu hadia Estrada sira nune’e komunidade sira bele muda husi situasaun izolamentu ba moris ne’ebé modernu no evita estabelesimentu grupu illegal sira.

Sekretariu Estadu mós promete sei hametin relasaun ho Sosiedade Sivil atu dezenvolve povu nia moris, hodi hare mós ba programa governu nian kona-ba halo uma 5 iha kada aldeia, nune’e bele garante nia kualidade.

Iha tempu hanesan, Reprezentante Sosiedade Sivil ne’ebé partisipa iha sorumutu ne’e hateten, Governu tenki tau matan ba programa halo Uma 5 iha kada aldeia, tamba realidade hatudu kakat, Uma ne’ebé governu halo la tuir kondisaun moris povu nian tanba la iha fatin oan ruma atu hakiak animal ka kuda ai-oan ruma, no uma ne’ebé harii besik malu liu difisil tebes ba sirkulasaun anin.

Sosiedade Sivil mós preokupa ho projeitu sira ne’ebé harii iha área rurál tanba barak mak la iha kualidade, tanba ne’e husu atu iha kooperasaun ne’ebé metin ho Sosiedade Sivil hodi bele halo monitorizasaun ba nia kualidade.

Relasiona ho Memorandum Intendimentu ne’ebé atu estabele entre Ministériu Administrasaun Estatal no ONF Forum Timor Leste, Sosiedade Sivil sira husu atu akorudu ne’e laós sai de’it hanesan memorandum intendimentu ida maibé sei bele kria dekretu lei ruma nune’e fasilita sosiedade sivil servisu hamutuk ho governu tau matan ba projeitu sira, nune’e bele dezenvolve ita nia nasaun. (Ato)

Leave a Reply

Your email address will not be published.

WordPress spam blocked by CleanTalk.