KONFERENSIA DA IMPRENSA

KONFERENSIA DA IMPRENSA

Hare ba prosesu kampanya partidos politika no eleisaun Parlamentar ne’ebe foin liu dadauk FONGTIL hakarak kongratula povu Timor Leste tomak, partidos politika sira, mak ho konsiensia no maturidade politika priense prosesu demokratiku ne’e iha ambiente paz, establidade, livre no transparansia nia laran. La haluha iha biban ida ne’e FONGTIL mos hakarak kongratula ba membru ONG local, nasional no Internasional mak servisu maka’as ba Edukasaun civika nomos partisipa ativu hanesan observador Nasional  duranti prosesu  Kampanye eleitoral to'o prosesu eleisaun nebe lao ho diak,paz no democratic.

Rezultadu eleisaun hatudu laiha partido ida mak manan ho votus mayoria atu bele priense kadeira parlamentar no forma governu V konstitusional, ho ida ne’e hatudu katak sei akontese koligasaun entre partido sira, Ho nune’e mak iha biban ida ne’e FONGTIL hakarak hato’o nia pozisaun hanesan tuir mai:

 

  1. Ho tane as ba paz no estabilidade, FONGTIL rekomenda ba partidos politika sira ne’ebe hetan asentu iha Parlamentu Nasional atu toma decizaun ba koligasaun ho respeita boot ba situasaun paz no estabilidade ne’ebe povu hatudu ona duranti prosesu kampanya no eleisaun mak foin liu dadauk, tetu mos ba konsiderasaun sira seluk hanesan ONU agora dadauk atu remata ninia misaun iha Timor Leste no foinsae sira mos hakarak hare lideres politika, veteranu sira ne’ebe nudar jerasaun tuan ka mata dalan duranti rejistensia atu hatudu pratika/lisaun ruma ne’ebe diak  nune'e  foinsae sira bele banate tuir hodi priense Ukun Rasik An mai oin.
  2. Ho tane as ba dezenvolvimentu, FONGTIL husu partidos ne’ebe hetan asentu iha Parlamento no atu governa, tenki realiza planu programa sira hotu ne’ebe promesa ona ba publiku liu husi kampanya partido politika.
  3. Transparensia no Akuntabilidade, FONGTIL husu ONG local, Nasional no Internasional sira ne’ebe namkari iha Timor laran tomak atu tau matan ba agenda prioridade governu nian iha nivel local to’o nivel nasional liu husi monitorizasaun no advokasia atu nune’e rekursu sira mak utiliza ba dezenvolvimentu sei sulin tuir nia dalan no sei to’o dunik hodi hadiak povu nia moris.
  4. Poder povu, FONGTIL husu ba povu eleitor tomak atu mantein pas no estabilidade no hamosu ajenda foun ba servisu tuir mai hanesan ijiji akuntabilidade ema sira mak ita hili, hodi tradus programa  sira ba realidade. Diferensia politika ne’ebe hatudu iha prosesu demokrasia mak foin liu dadauk nudar fahe ida ba harii no kontrusaun ba nasaun, diferensia laos atu hamosu  violensia ou ka destroisaun. 

 

Ida ne’e mak pozisaun FONGTIL nian, dala ida tan parabens ba povu tomak, parabens ba partidos politika, parabens ba partidos mak hetan asentu iha parlamentar no parabens mos membrus ONG tomak ne’ebe haknar an hodi harii demokrasia iha Timor Leste.

 

 Justino da Silva                               

 Prezidenti Konselhu FONGTIL

Leave a Reply

Your email address will not be published.

WordPress spam blocked by CleanTalk.