Kooperasaun ne’ebé metin entre Governu no Sosiedade Sivil sei kontribui ba dezenvolvimentu nasionál.

Distritu Ermera. Rede Lian Distritu Ermera (LIDER) Sesta-feira ne’e (21/09/2012) organiza seminariu konsultasaun Distritu hodi hamenti relasaun entre governu ho sosiedade sivil hodi kontribui ba dezenvolvimentu nasional, liu husi monitorizasaun ba projeitu sira ne’ebé hala’o iha Ermera.

Seminariu ne’ebé realiza iha Salaun Administrasaun Distritu Ermera ne’e partisipa husi Xefe Suku kuaze iha distritu Ermera tomak no reprezentante ONG sira, no oradór sira mai husi Reprezentante Administrador Distritu Ermera, Reprezentante Asesór Primeiru Ministru ba Asuntu Sosiedade Sivil, inkluindu aprezentasaun husi Diretor Ezekutivu FONGTIL Arsenio Pereira ne’ebé ko’alia kona-ba papel Sosiedade Sivil hodi halo monitorizasaun ba projeitu sira ne’ebé hala’o iha área rurál.

Seminariu ne’e hahú uluk ho aprezentasaun rezultadu monitorizasaun ba projeitu Pakote Referendu, PDD no PDL tinan 2011 ne’ebé hala’o husi Rede Lian Distritu Ermera iha Sub-distritu tomak iha Ermera.

Serimonia ne’e hetan antusiasmu makaas husi Xefe Suku sira, hodi hato’o sira nia lamentasaun no rekomendasaun kona-ba projeitu sira ne’ebé hala’o iha sira nia suku, tanba tuir Xefe Suku sira katak durante ne’e Kompañia sira ne’ebé halo projeitu, barak mak la iha kualidade.

Xefe Suku sira mós konsidera projeitu sira ne’ebé harii dala barak latuir prosedimentu no iha kompañia balun ne’ebé tama ona iha lista metan maibe sira hetan nafatin projeitu.

Seminariu ne’ebé hala’o durante loron ida ne’e hetan suporta husi Irish Aid no ONG Internasional Progressio. (Ato)

Leave a Reply

Your email address will not be published.

WordPress spam blocked by CleanTalk.