LANSAMENTU REDE NASIONÁL BA PREVENSAUN KONFLITU.

Diresaun Nasionál Prevensaun Konflitu Komunitariu (DNPCC) iha Sekretariu Estadu Seguransa hamutuk ho nia parseiru no Sosiedade Sivil iha Kuarta-feira ne’e (26/06/2013) lansa ona Rede Nasionál ba Prevensaun Konflitu.

Serimonia lansamentu ne’ebé realiza iha Salaun Enkontru CNE Colmera Dili ne’e, hala’o diretamente husi Sekretariu Estadu Seguransa Francisco Guterres, akompaña husi Segundu Komandante Jerál PNTL, Diretór Jerál husi Ministériu relevante hanesan Ministeriu Solidaridade no Sosiál, Ministériu ESTATAL, SEPFOPE, Sekretariu Estadu Terras no Propriedade, Sekretariu Estadu Juventude no Desportu, inklui Reprezentante Sosiedade Sivil no Xefe Suku sira.

Rede ida ne’e sei kompostu husi Instituisaun Governu no Sosiedade Sivil ne’ebé hala’o knar iha área prevensaun konflitu.

Knar sira ne’ebé Rede Nasionál Prevensaun Konflitu (RNPK) atu hala’o mak halibur no fahe informasaun ba parte hotu, hodi hatene no akompaña kona-ba asuntu konflitu atuál no potensia konflitu ne’ebé bele mosu iha futuru.

Rede ida ne’e sei hala’o mós knar hodi suporta Diresaun Nasionál ba Prevensaun Konflitu Komunitaria – SES atu define padraun ba Polítika Prevensaun Konflitu no Jestaun hodi Prevene konflitu Komunitaria.

Iha parte seluk, estabelesimentu Rede ida né mós sei dezenvolve sistema monitorizasaun no evaluasaun bazeia ba indikadór sira ne’ebé iha, no mós efetiva liu tan servisu diskusaun entre membru sira. Promove atividade harii kapasidade liu husi formasaun ka seminariu nasionál hodi reforsa polítika ba prevensaun konflitu, nune’e bele atinji Paz no Estabilidade iha Timor-Leste.

Leave a Reply

Your email address will not be published.

WordPress spam blocked by CleanTalk.