Reprezentante UNMIT hala’o sorumutu regular ho Organizasaun Sosiedade Sivil hodi fahe informasaun ba malu.

Dili. Reprezentante Sekretariu Jerál Nasoens Unidas iha Timor Leste Finn Reske Nielsen ho Offisiál Ajensia ONU nian, Tersa-feira ne’e (02/10/2012) hala’o enkontru ho Organizasaun Sosiedade Sivil hodi pasa informasaun ba malu relasiona ho misaun UNMIT ne’ebé atu remata no apoiu ne’ebé sei fó hafoin misaun UNMIT remata.

Finn liu husi nia intervensaun durante sorumutu ne’ebé hala’o iha Salaun Enkontru UNMIT Obrigadu Barak hateten, enkontru ne’e hanesan oportunidade ida di’ak tebes atu fahe informasaun ikus kona-ba planu atu hakotu misaun ONU iha Timor Leste no politika saida mak sei bele kontinua hafoin misaun ne’e remata iha loron 31 Dezembru 2012.

Nia informa ba Reprezentante ONG sira katak, hafoin misaun ONU remata sei iha nafatin ekipa reprezentante ida iha Timor atu kontinua fó suporta, maibé planu ida ne’e sei halo konsulta ho parte hotu-hotu hanesan Prezidente Repúblika, Parlamentu Nasionál, Governu no entidades hotu.

“Hau halo konsulta ho Prezidente Republika no Governu hafoin formasaun Quinto Governu Konstitusionál hodi aranja programa no bainhira Sekretariu Jerál ONU Ban Ki-moon mai vizita Timor Leste iha loron 15-16 Agostu 2012 mós ko’alia ona kona-ba apoiu post-UNMIT”, dehan Finn.

Nia informa katak, tama ba fulan Novembru, movimentu Polisia ONU nia sei redúz no hahú iha retirada ba pesoal UNMIT tuir etapa no sei mantein de’it ofisial balun ne’ebé sei kompleta formasaun ba PNTL to’o meadu fulan Dezembru 2012, no to’o fin de Dezembru 2012 sei iha de’it ekipa kiik ida kauze Ema 150 atu entrega xavi no hato’o agradesimentu ba kooperasaun sira ne’ebé durante ne’e halo, no iha inisiu fulan Janeiru 2013 sei iha de’it Ema kuaze 75 hanesan fase ikus ba retirada UNMIT husi Timor Leste.

Entretantu, durante enkontru ne’e, parte Sosiedade Sivil mós pasa informasaun kona-ba progresu sira ne’ebé durante ne’e ONG no Rede ONG sira halo liu-liu iha área justisa no edukasaun nian ne’ebé hetan apoiu husi UNMIT.

Parte Sosiedade Sivil propoin katak, hafoin misaun UNMIT remata bele kontinua enkontru regular ho ajensia ONU nian hanesan UNDP, nune’e bele fahe informasaun ba malu no haforsa Organizasaun Sosiedade Sivil hodi dezenvolve Timor Leste.

Partisipa iha sorumutu ne’e, ofisial Ajensia ONU hanesan UNDP, UNICEF no Reprezentante ONG kuaze 20-resin ne’ebé koordena husi ONG Forum (FONGTIL). Ato

Leave a Reply

Your email address will not be published.

WordPress spam blocked by CleanTalk.