Sosiedade Sivil Timor Leste konsidera ConocoPhillips no Woodside la hatuur sira nia vontade atu mantein transparénsia.

Dili. Forum ONG Timor-Leste ( FONGTIL ) hamutuk ho Rede CGT (Core Group Transparency)  ne’ebé servisu kleur ona iha área transparénsia no akontabilidade ba Orsamentu no rendimentu petrolíferu konsidera Kompañi Mina ConocoPhillips, Woodside no nia parseiru sira la hatuur sira nia vontade atu mantein transparénsia.

Alende ne’e Kompañia sira mós aproveita frakeza Timor-Leste nia instituisaun reguladór nian hodi kontinua nauk osan sira ne’ebé loloos sai direitu ba povu Timor Leste.

Deklarasaun ne’ebé fó sai liu husi Konferensia Imprensa ne’ebé Sosiedade Sivil halo iha Salaun Enkontru FONGTIL Tersa-feira (09/10/2012) akuza mós kompañia katak, sira la halo tuir obrigasaun legal tuir kontratu nian tanba kompañia sira ne’e kontinua buka dalan atu lori rekursu legal atu lakohi selu fali osan ne’ebé sira nauk ona husi povu Timor Leste.

Liu husi Konferensia Imprensa ne’e mós Sosiedade Sivil hato’o pozisaun hodi ezije ba Kompañia ConocoPhillips no Woodside tenke kumpri duni obrigasaun legál hodi selu taxa tuir Kontratu Fahe Produsaun no respeita tratadu Tasi Timor.

Sosiedade Sivil liu husi Forum ONG Timor-Leste ( FONGTIL ) hamutuk ho rede CGT (Core Group Transparency) mós ezije Kompañia Mina-rai sira tenke promove transparénsia liu husi halo relatóriu ne’ebé pagamentu taxa  ho detallu (Disaggregate), no sira tenke konkorda template relatóriu EITI ne’ebé auditor  More Stephens  prepara, no Kompañia sira tenke suporta publikasaun relatóriu EITI 2010 no 2011 iha tinan ida ne’e.

Entretantu ba Governu Timor Leste, Sosiedade Sivil ezije atu governu tenki afirma nia pozisaun loloos kona-ba relatoriu EITI no tenke halo lei ida hodi regula implematasaun EITI ho karakter mandatory, no la’ós voluntariu.

Governu mós tenke haforsa rekursu atu monitoriza reseita husi Kustu operasaun no pagamentu taxa no royalty ne’ebé kompañia sira selu hodi verifika katak reseita no pagamentu sira ne’e lejítimu duni.

Ikus, Sosiedade sivíl prontu atu hamriik hamutuk Estadu hodi luta hasoru manipulasaun kompañia sira ne’ebé la benefisia povu Timor Leste tomak.

Leave a Reply

Your email address will not be published.

WordPress spam blocked by CleanTalk.