Timor Leste sei frazil ba asuntu migrasaun, maibé presiza iha lei ida forte hodi regulariza.

Dili. Forum ONG Timor Leste – FONGTIL Sesta-feira ne’e (19/10/2012) organiza Sorumutu ida ho Asistensia Tekniku Intra ACP Migration Facility Patrick Marega Castalan, hodi ko’alia kona-ba importansia Rede Migrasaun no posibilidade harii Rede Migrasaun iha Timor Leste.

Sorumutu ne’ebé hala’o iha Salaun Enkontru FONGTIL ne’e ho intensaun fahe informasaun ba malu, atu nune’e membru ONG sira bele kompriende di’ak liu tan kona-ba kestaun Migrasaun no planu estabelesimentu rede migrasaun.

Patrick Marega iha nia intervensaun fahe mós informasaun kona-ba atividade ACP ne’ebé hala’o liu husi komponente sira hanesan, hasae kapasidade Orgaun Governu no Instituisaun Nasional sira ne’ebé iha relasaun direta ho asuntu migrasaun, suporta Organizasaun Sosieda Sivil hanesan ONG  ne’ebé mós bele hola parte iha diálogu nune’e bele kontribui iha polítika no peskiza ne’ebé implementa husi observadór ACP nian.

Tuir Patrick, komponente sira ne’e importante tebes atu hala’o servisu no asuntu migrasaun la’ós buat ida ne’ebé foun ba Timor Leste, maibé ACP servisu hamutuk ho governu no Instituisaun Nasionál seluk atu estabele polítika ba asuntu ne’ebé positivu.

Nia hateten, servisu ba asuntu migrasaun husi ACP hala’o tiha ona kuaze tinan ida nia laran hodi halo konsultasaun, nune’e bele tau hamutuk ideia husi governu no sosiedade sivil hodi diskuti kona-ba asuntu ne’ebé relevante ba migrasaun no hala’o sorumutu regular.

“Migrasaun no dezenvolvimentu hanesan buat boot ida ne’ebé ita presiza ko’alia no tau iha raga ida nia laran. Ita bele konsiente katak migrante balun mai servisu iha ita nia rain, balun tuir regulamentu no balun servisu ho illegalmente, enkuantu Timor Oan tenki ba servisu iha nasaun seluk tuir dalan ne’ebé legal, tanba ne’e tenki iha politika ruma ne’ebé dirije ba migrasaun”, dehan Patrick.

Iha mós pontu negativu balun husi migrasaun mak abuzu no exploitasaun. Impaktu sira ne’e bele hamosu risku no sai problema ba ita, tanba ne’e presiza support husi ONG sira iha nia implementasaun, monitorizasaun no koordenasaun hodi hamenus risku no problema ne’ebé akontese.

Kestaun balun ne’ebé presiza debate no hare hamutuk mak husi parte trafiku nian, presiza hetan estandarizasaun ida ne’ebé di’ak, no parte ONG sira presiza proteje vítima sira. Alende ne’e presiza tuur hamutuk hodi halo diskusaun atu hare problema balun ne’ebé akontese hanesan migrante sira ne’ebé mai tama iha ita nia rain.

Timor Leste hanesan nasaun foun no sei frazil ba asuntu imigrasaun, maibé presiza iha polítika ida forte atu proteje maluk Timor Oan seluk ne’ebé ba servisu iha nasaun seluk, no sertu katak presiza iha planu dezenvolvimentu ne’ebé forte.

Iha tempu hanesan, Membru Sosiedade Sivil balun hateten, problema husi migrasaun ne’ebé akontese iha ita nia nasaun, tanba implementasaun ba lei mak sei menus no lei balun ne’ebé seidauk iha hodi regula estranjeiru sira ne’ebé mai ho viza turista, maibé hala’o fali servisu no halo negosiu.

Sosiedade Sivil mós husu atu Organizasaun Internasional sira bele tuur hamutuk no fó hanoin ba governu atu kria lei ruma ne’ebé bele regula Timor oan sira no regula mós estranjeiru sira ne’ebé hela ho illegal iha Timor Leste. (Ato)

Leave a Reply

Your email address will not be published.

WordPress spam blocked by CleanTalk.